” جعفر سامسونج ” يتحدث عن نقطة تحول غيرت مسار حياته العملية

تحدث احمد على جعفر رئيس قطاع التسويق بشركة سامسونج مصر عن نقطة تحول هامة فى تاريخه وغيرت مسار حياته العملية تماما

.قال جعفر فى تدوينة له على حسابه الرسمى عبر موقع التواصل الاجتماعي فيس بوك ” معظمنا مَر و لسة هايُمُر بنقط تحول في حياته؛ ممكن تكون نقطة التحول دي كلمة بسيطة أو نصيحة صادقة إتقالت لك علي الماشي من حد أمين بس غيِّرت شخصيتك تماماً أو في معظم الأحيان نقطة التحول بتكون موقف حياتي او حتي في البيزنس غيّرك ١٨٠ درجة

نقطة التحول مش بتيجي كتير في حياة الواحد و في معظم الأحيان لما بتيجي بتبقي في شكل حاجات سلبية أو مُحبطة للأسف!! بس انت و شطارتك يا إما تستسلم للحاجة دي و تاخدك لتحت، يا إما تواجه الموقف كنوع من أنواع التحدي اللي هاتستغلوا في تغيّر حياتك كلها للأفضل…

تجربتي الشخصية: أول مدير لي في حياتي، من حوالي ١٩ سنة، ما كانش بيحبني خالص و مرة من المرات قالي إنت فاشل في البيزنس 😥😥 و كل زمايلك متضايقين منك 😥😥!
و من هنا بدأ الإحباط و الإكتآب و الإنهيار النفسي و حاجات كتيرة أوي…، بس الحمد لله ربنا قدّرني و حولت الموقف ده لأكبر تحدي في حياتي المهنية؛ أخدت القرار إني لازم أثبت لنفسي أولا ثم للي حواليا إني مش بس عكس أي حاجة قالها عني المدير ده، لأ ده أنا كمان لازم أتفوّق أكتر و أحقق نجاحات أكبر و إكبر!
شكرا للمدير ده اللي كان سبب في أكبر نقطة تحول حصلت في حياتي من ١٩ سنة!

“وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ”